Welina Mānoa

Ka Huakaʻi ʻAna i ka Hale Hōʻikeʻike ʻo Mānoa Heritage

Ka Papa Haʻawina No Ke Kumu Aʻo

E kaomi i kēia ʻōlelo no ka hoʻīli ʻana mai i ka papahana haʻawina ma ke ʻano he pdf

Nā Manaʻo Nui

He huakaʻi kēia e maopopo ai…

  • I ka holo ʻana o nā makahiki, loli ke ʻano o ka ʻāina ma muli o ka hana a ke kanaka.
  • Pili ka ʻāina mai uka a i kai a pili nō hoʻi ka ʻāina a me ke kai.
  • Pili ka ʻāina, ka wai, nā akua, a me ke kanaka a he pilina ʻohana nō ia.
  • He moʻolelo a he moʻokūʻauhau ko ka ʻāina, ka wai, nā akua, a me ke kanaka.
  • He kuleana koʻikoʻi ka hoʻopaʻanaʻau ʻana i nā moʻokūʻauhau a me ka haʻi ʻana i nā moʻolelo me ka maiau a me ka maʻemaʻe, no ka mea, pēlā e ola ai kākou.

Nā Kumu ʻIke

Ma Mua o ka Huakaʻi

  • E heluhelu nā haumāna i ka palapala haʻawina ʻo Welina Mānoa no Ka Hale Hōʻikeʻike ʻO Mānoa Heritage i launa mua ʻia ka wahi e kipa ana a i maopopo ke ʻano o ka haʻawina e hana ana ma laila.
  • E nānā paha i ka palapala haʻawina ʻo Welina Mānoa i hoʻomōhala ʻia no nā ʻohana a me nā keiki i piha ai nā makahiki he ʻewalu (a emi iho) e pili ana i Ka Hale Hōʻikeʻike ʻO Mānoa Heritage i launa mua ʻia ka moʻolelo no kēlā wahi.
  • E nānā paha i nā palapala ʻāina i maopopo kahi e hele ana a me kona pilina i nā wahi ʻē aʻe o Mānoa i kipa ʻia ma mua a e kipa ana ma hope.

***E Makaʻala***

Ma ka papa haʻawina, …

  • Uliuli nā ‘ōlelo i ke kumu.
  • ʻEleʻele nā ʻōlelo a ke kumu i nā haumāna.

Ka Huakaʻi

9:00am – 9:20am

E hui ma ka lānai o ke keʻena no ka hoʻolauna ʻana iā Mānoa a me ka Hale Hōʻikeʻike ʻo Mānoa Heritage ma o nā moʻolelo a me nā moʻokūʻauhau o ka ʻāina a me ke kanaka o Mānoa.

Nā manaʻo nui e kālele ai:

  • ʻOkoʻa ka ʻāina i kēia manawa, ʻokoʻa ka ʻāina i ka wā kahiko. (E hōʻike a wehewehe ʻia ka loli ʻana o ka ʻāina ma o nā kiʻi kahiko o Mānoa i ʻikemaka nā haumāna i ia loli ʻana.)
  • Pili ka ʻāina mai uka a i kai a pili nō hoʻi ka ʻāina a me ke kai ma muli o ke kahe ʻana mai o ka wai, no laila, pili ka Hale Hōʻikeʻike ʻo Mānoa Heritage me Ka Papa Loʻi ʻo Kānewai a me ka Hale Hōʻikeʻike Iʻa o Waikīkī.
  • He moʻolelo/moʻokūʻauhau ko ke kanaka a he moʻokūʻauhau ko ka ʻāina kekahi, a aia ke kanaka Hawaiʻi a me ka ʻāina Hawaiʻi i ka moʻokūʻauhau like.
  • ʻO ka haʻi ʻana i nā moʻolelo a me nā moʻokūʻauhau kekahi loina Hawaiʻi a ke kupuna a na kākou e hoʻomau i kēia mau loina i kēia wā me ka maiau a me ka maʻemaʻe, no ka mea, he kuleana koʻikoʻi kēia no kākou.

Ka moʻolelo no ke awāwa o Mānoa a me ka ʻohana Cooke

He ʻĀina Kapu ʻo Mānoa.

  • Aia kākou i ka ʻili ʻo Pāhaʻo i ke awāwa ʻo Mānoa i ke ahupuaʻa ʻo Waikīkī. He ‘āina kapu nō ‘o Mānoa.
    • Noho nā aliʻi ma Mānoa i ka wā kahiko e laʻa ʻo Kaʻahumanu ma Puahuula ma kahi kokoke i kēia hale.
    • Noho nā akua, nā ʻaumākua, a me nā kupua ma Mānoa e laʻa ʻo Kahalaopuna–ke kaikamahine ali‘i kapu o Mānoa, kona kinolau ʻo ke ānuenue, a me kona ʻaumakua ʻo ka pueo. E lohe ana ʻoukou i kekahi moʻolelo no Kahalaopuna i kēia lā a e ʻikemaka ana paha ʻoukou i kona kinolau a me nā kinolau o kona ʻohana.
    • Nui nā heiau i kūkulu ‘ia e nā kūpuna ma Mānoa. Ma mua, aia lā ma kahi o ‘umikūmāhā heiau. Eia na‘e, ho‘okahi wale nō heiau i koe, ‘o Kūka‘ō‘ō kona inoa, a ke kū mau nei ma ka ‘āina i lilo i ka ‘ohana Cooke. E lohe ana ʻoukou i kekahi moʻolelo no Kūkaʻōʻō i kēia lā a e ʻikemaka ana ʻoukou i ka heiau e kū mau nei.

No ka ʻohana Cooke

  • Ua lilo kēia ʻāina i ka ʻohana Cooke i ka makahiki 1910.
  • ʻO Kūaliʻi ka inoa o ka hale nui a lākou i kūkulu ai i kapa ʻia no kekahi aliʻi nui o Oʻahu. I ko lākou kūkulu ʻana i ka hale, mālama ka ʻohana i ka heiau; huki ʻia ka nāhelehele a me nā lāʻau haole e ulu ana i loko; ua paepae hou ʻia nā pōhaku e kekahi loea me ka maiau a me ka maʻemaʻe, a ua kanu ʻia nā mea ulu Hawaiʻi a puni ka heiau.

Ua loli ka ʻĀina o Mānoa.

  • ʻOkoʻa ka ʻāina i kēia manawa, ʻokoʻa ka ʻāina i ka wā kahiko.
  • Hoʻomanaʻo ʻoukou i nā kiʻi kahiko o Waikīkī a kākou i ʻike ai ma Ka Papa Loʻi ʻo Kānewai? Like ka ʻāina i ka wā kahiko me ka ʻāina i kēia manawa? ʻAʻole loa. Pehea i ʻokoʻa ai?
    • Kupuna Olivera—He aha nā ʻōlelo a Kupuna Olivera no ke ʻano o ka ʻāina ma Waikīkī? Ma mua, nui ka wai, ke kalo, a me ka laiki ma Waikīkī akā i kēia manawa, nui nā hale a me nā alanui. Ua kūkulu ʻia nā hale, ua hoʻopiha ʻia nā kahawai/pūnāwai/ muliwai, a ua ʻeli ʻia ka Ala Wai. Pehea ʻo Mānoa? Ua loli ka ʻāina ma ʻaneʻi kekahi? ʻAe.
    • Nā Kiʻi Kahiko o Mānoa—E nānā i kēia mau kiʻi–he aha ke ʻano o ka ʻāina ma mua? Pehea i kēia manawa? I ka wā kahiko, piha ke awāwa i nā lo‘i kalo a ‘auana nā kahawai i ‘ō a i ‘ane‘i. I kēia manawa, piha ‘o Mānoa i nā hale a me nā alanui, a pau ka hapanui o nā mea o ka wā kahiko.
    • Kupuna Hanale Maka E hoʻolohe kākou i ka leo o kekahi mānaleo no Mānoa e wehewehe ana i ke ʻano o ka ʻāina i kona wā kamaliʻi.  E hoʻolele ʻia ka lola Ka Leo Hawaiʻi HV24.46A, 12:00-13:17 (1 min, 17 sec). 12:00-13:17—Nui ka Hawaiʻi? Nui nā poʻe Hawaiʻi. Ma mua ma Mānoa, nui ka poʻe Hawaiʻi, Hawaiʻi wale nō. Poʻe Kepanī kanu pua, poʻe kanu pua. Poʻe Pākē paha?…ʻo ka Pākē, Wong Lee(?) ʻo ia ka haku o ke kalo, loʻi kalo. Nui nā loʻi kalo mai uka mai a hiki i lalo o ke alanui ʻo University. ʻĀina kalo nui kēlā. I think, ʻoi aku kona nui ma mua o Waipiʻo. Nā ʻaoʻao ʻelua, loʻi kalo. ʻĀina ākea kēlā o Mānoa. Pololei. ʻAe, no ka mea, kēlā manawa, poʻe noho ma kēlā wahi, ʻaʻole lākou uku e like me kēia manawa. Emi loa ka ʻāina i kēlā manawa. Ka poʻe Pākē, kanu lākou i ke kalo. ʻO ka laiki, ma lalo nei i Mōʻiliʻili. Mānoa, ʻāina kalo wale nō.
    • Ka Wai—Ua piha ‘o Mānoa i nā lo‘i kalo ma nā ‘ao‘ao ‘elua mai uka a hiki i kahi o ka Hale Hōʻikeʻike Iʻa o Waikīkī i kēia lā (e nānā hou i nā kiʻi kahiko). He aha ka mea koʻikoʻi loa e pono ai nā loʻi kalo? KA WAI. Nui nā kumu wai o Mānoa a he awāwa ākea nō ho‘i ia (ʻo ia kekahi manaʻo o mānoa). E ʻikemaka ʻoukou i kona ākea i kēia lā a e lohe ana i nā moʻolelo no kekahi o nā kumu wai.

Pili ke kai a me ka ʻāina.

  • Ua kipa ʻē ʻoukou i ka Hale Hōʻikeʻike Iʻa o Waikīkī a me Ka Papa Loʻi ʻo Kānewai a eia ʻoukou i ka Hale Hōʻikeʻike ʻo Mānoa Heritage i kēia lā. Aia kēia hale a me ka papa loʻi kalo ʻo Kānewai i uka ma Mānoa a aia ka muliwai o Waikīkī i kai ma kahi o ka Hale Hōʻikeʻike Iʻa o Waikīkī (nānā paha i ka palapala ʻāina). ʻAno mamao nā wahi ʻekolu akā pili lākou a pau. No ke aha? Pehea e pili ai?–ka wai (kahe ka wai mai uka a i kai, mai ka papa loʻi kalo a i ka muliwai).
    • Kupuna Olivera—Hoʻomanaʻo ʻoukou i nā ʻōlelo a Kupuna Olivera? Wahi āna, mai hea mai ka wai i komo i ke kai o Waikīkī i kona wā kamaliʻi? Mai Mānoa me Pālolo mai ka wai. ʻOkoʻa paha ke kahe ʻana o ka wai i kēia manawa? ʻOkoʻa ma kekahi ʻano ma muli o nā hale a me nā alanui i kūkulu ʻia, akā, mai Mānoa me Pālolo mau nō ka wai e komo mau ana i ke kai o Waikīkī i kēia mau lā. No laila, pili ka Hale Hōʻikeʻike ʻo MH, ka Papa Loʻi ʻo Kānewai a me ka muliwai o Waikīkī, no ka mea, heleleʻi ka ua i uka ma kahi o ka Hale Hōʻikeʻike ʻo MH, kahe ka wai i ke kahawai ma Mānoa, komo i loko o nā loʻi kalo ʻo Kānewai, hoʻi i ke kahawai, noke i ke kahe ʻana i kai a hui me ke kai ma ka muliwai o Waikīkī ma kahi o ka Hale Hōʻikeʻike Iʻa o Waikīkī. A like ka huakaʻi ʻana a ka wai mai Pālolo a i Waikīkī kekahi.
    • Nā Pono Lawaiʻa—Hoʻomanaʻo ʻoukou i nā pono lawaiʻa i nānā ʻia ma ka Hale Hōʻikeʻike Iʻa o Waikīkī? He aha nā mea e pono ai ka hana ʻana i nā pono lawaiʻa? Pono nā lāʻau o ka ʻāina a me nā iʻa o ke kai (ke kīholo, ka ʻupena, a pēlā aku). No laila, pili ka ʻāina a me ka kai, ʻeā? Ma hea e ulu ai nā lāʻau e laʻa ka ʻōhiʻa lehua a me ke kauila? I uka nei. E ʻikemaka ʻoukou i kēia mau lāʻau ma ʻaneʻi i kēia lā.

Pili ka ‘āina a me ke kanaka Hawai‘i—Moʻokūʻauhau

  • He aha ia mea he moʻokūʻauhau? ʻAno like ka moʻokūʻauhau i ka moʻolelo, akā ma ka moʻokūʻauhau e helu ʻia ai nā inoa ʻohana mai ke kupuna a i ka moʻopuna.
  • I mea aha ka moʻokūʻauhau? I mea ka moʻokūʻauhau i hoʻomanaʻo ai i nā inoa ʻohana, e ola ai nā iwi kupuna, a e ola ai kākou a pau.
  • He moʻokūʻauhau ko ʻoukou, ʻeā? Pehea ka ʻāina? He moʻokūʻauhau ko ka ʻāina kekahi? He aha kekahi moʻokūʻauhau o ka ʻāina i maopopo iā ʻoe? Pehea ʻo Hāloa. He ʻohana ke kalo a me ka ʻāina no kākou. Aia ka ‘āina, ke kalo, a me ko Hawai‘i lāhui i ka mo‘okū‘auhau like. ‘O ka ‘āina a me ke kalo nā kaikua‘ana a ‘o ke kanaka ke kaikaina. Mālama ka ‘āina i ke kanaka a mālama pū ke kanaka i ka ‘āina i pono nā mamo a Hāloa. Hiki ke ʻike ʻia, paʻa ke kanaka a me ka ʻāina i ka moʻokūʻauhau like a he kuleana ko kākou e mālama i ko kākou kaikuaʻana, ʻo ia hoʻi ke kalo a me ka ʻāina.
  • E lohe ʻoukou i ka moʻokuʻauhau o kekahi kupaʻāina kaulana o Mānoa a paʻa pū nō hoʻi ka ʻāina, ka wai, ke akua, a me ke kanaka i kona moʻokūʻauhau.

Ka Haʻawina—Hoʻopaʻanaʻau a haʻi hou i ka moʻolelo

  • Pili ka ‘āina a me ke kanaka Hawai‘i. ‘A‘ole hiki ke hemo ka pilina, no ka mea, pa‘a mau ka ‘āina a me ke kanaka i ka mo‘okū‘auhau ho‘okahi. A hoʻoikaika ʻia kēia pilina ʻohana ma o ka hoʻopaʻanaʻau ʻana a me ka haʻi ʻana i ka moʻokūʻauhau.
  • No ke aha he mea nui ka mālama a haʻi ʻana i ka moʻokūʻauhau a me nā moʻolelo me ka maiau a me ka maʻemaʻe? He loina Hawaiʻi ia kā nā kūpuna. He mea nui ka hoʻōla a hoʻomau ʻana i kēia mau loina Hawaiʻi, no ka mea, ola kākou (ka ʻāina, ka wai, ke akua, a me ke kanaka) i nā moʻolelo a me nā moʻokūʻauhau. Eia kekahi–Inā maopopo kou moʻokūʻauhau, maopopo nō hoʻi kou kuleana e laʻa ke kuleana no ka mālama ʻāina i aʻo ʻia ma o ka moʻokūʻauhau no Hāloa.
  • I kēia lā, e mākaʻikaʻi kākou ma nā hui liʻiliʻi a puni ka hale a me ka heiau. ʻOiai kākou e mākaʻikaʻi ana, e lohe ʻia ʻelua moʻolelo no Mānoa. A i loko o ia mau moʻolelo nā moʻokūʻauhau o ka ʻāina a me nā kūpuna no ia ʻāina ʻo Mānoa. Ma hope, e haʻi hou ana ʻoukou i nā moʻolelo a moʻokūʻauhau ʻelua ma nā hui liʻiliʻi i maopopo iā kākou a pau a i ola mau nā inoa a me nā moʻolelo o nā kupuna no Mānoa. Ua maʻa loa nā kūpuna i kēia hana a ʻaʻole kākou hoʻomaʻamaʻa mau i ka hoʻopaʻanaʻau a haʻi moʻolelo ʻana i kēia mau lā, no laila, e hoʻomaʻamaʻa kākou i kēia lā. A ma ka hopena, ma muli o kēia haʻi moʻolelo ʻana, aia ana nō ʻoukou i ka moʻokūʻauhau o kēia ʻāina kekahi.
  • Eia nā mea e makaʻala ai i ko ʻoukou hoʻolohe a hoʻopaʻanaʻau ʻana:
    • nā inoa o nā kūpuna a me nā inoa ʻāina
    • ka moʻokūʻauhau o nā kūpuna a me ka ʻāina
    • ka pilina i ka wai
    • hoʻokahi a ʻelua paha mea ulu Hawaiʻi

9:20am -10:00am

E mākaʻikaʻi ʻelua hui liʻiliʻi a puni ka hale a me ka heiau. I ka mākaʻikaʻi ʻana, e lohe ʻia ʻelua moʻolelo no Mānoa (1—Kahalaopuna; 2—Kawelo me ka heiau ʻo Kūkaʻōʻō). A laila, e haku nā haumāna i hōʻikeʻike no nā moʻolelo ʻelua.

Ka Mākaʻikaʻi A Me Ka Haʻi Moʻolelo

  • Kaʻawale ʻia ka papa i ʻelua hui.
  • Hoʻomaka ka hui mua i ka ʻaoʻao hema o ka hale, noho i ka pā mauʻu o ka “White Garden”, a hoʻolohe i ka moʻolelo no Kahalapuna. Ma hope, piʻi i ke alahele a puka i ka “arbor”. Ma laila e kuhikuhi ai iā Akaka, Nālehuaoakaka, ka ua Tuahine, ka makani Kahaukani, ke kualono ʻo Waʻahila kahi e moe ana ʻo Kauhi, a me ke ākea o ke awāwa.
  • Hoʻomaka ka hui ʻelua i ka pā mauʻu nui ma lalo o ka lānai, nānā i nā māla ʻai, piʻi i ke alahele a puka ma luna o ka heiau, hoʻi i lalo i ka pā mauʻu o ka “White Garden”, a hoʻolohe i ka moʻolelo no Kūkaʻōʻō a me Kawelo.

Ka Hui ʻAkahi (No Kahalaopuna)

manaʻo nui

  • He mea nui ka haʻi ʻana i nā moʻolelo a me nā moʻokūʻauhau ma ka ʻāina me ka maiau a me ka maʻemaʻe i lohe nā kūpuna no ia ʻāina i ko lākou mau inoa a me ko lākou moʻolelo.
  • Pili ke kanaka a me ka ʻāina; aia kākou i ka moʻokūʻauhau like e laʻa ʻo Kahalaopuna: ʻo kona kupuna kāne ka puʻu ʻoiʻoi ʻo Akaka; ʻo kona kupunahine ka ulu lehua ʻo Nālehuaoakaka (e ʻimi i ka ʻohiʻa lehua ma nā māla o MHC.); ʻo kona mau mākua ka ua Tuahine a me ka makani ʻo Kahaukani; ʻo kona ʻaumākua ka pueo a me ka ʻelepaio.
  • Pili ka moʻolelo a me ka moʻokūʻauhau o Kahalaopuna i ka wai (ʻo kona makuahine ka ua Tuahine; ʻo kona kinolau ke ānuenue).

No Kahalaopuna, ke kaikamahine aliʻi kapu o Mānoa

(haʻi hou ʻia e Maya Saffery)

He kupa ʻāina ‘o Kahalaopuna no Mānoa. ʻO nā ‘āina, nā lā‘au, a me nā manu o Mānoa kona ‘ohana. Nona kēia moʻokūʻauhau a me kēia moʻolelo.

Māhele Mua
‘O Akaaka ke kāne. ‘O Nālehuaoakaaka ka wahine.
Moe pū lāua a hānau mai he mau keiki māhoe.
‘O Kahaukani ke keiki kāne a ‘o Kauakuahine ke kaikamahine.

Moe nī‘aupi‘o lāua a hānau mai ‘o Kahalaopuna, ke kaikamahine ali‘i kapu o Mānoa.
Ola ka hā loa o ko Kahalaopuna ʻohana. Ola!
Ma mua o ke kūkulu ʻia ʻana o nā hale a me nā alanui i Mānoa, ʻo ka wai a me nā lāʻau Hawaiʻi wale nō nā mea i ʻike ʻia ma kēia awāwa ākea, a kāhiko mau ʻia ka nahele o Mānoa e nā ānuenue a me ka ua kilihune. I ia wā, ua hānau ʻia ʻo Kahalaopuna, ke kaikamahine nani ʻiʻo nō. He mau maka poni kona me ka lauoho kālole. Akā, ʻaʻole ʻo ia hui me ka lehulehu a ʻaʻole ʻo ia pāʻani me nā hoa. Ua hūnā ʻia ihola ʻo ia i kona hale aliʻi i ka malu o ka ulu ʻiliahi i loko lilo o Mānoa, no ka mea, he aliʻi kapu ʻo ia no kekahi aliʻi kiʻekiʻe no Kailua. ʻO Kauhi kona inoa.

                       E ʻōlelo hou ke kumu i nā inoa o nā kūpuna a e hoʻopili nā haumāna i paʻa i ka naʻau.

Ma mua o ko lāua hui ʻana, ua ʻaʻe ʻia kona kapu e ʻelua aliʻi. Ua hele nihi akula lāua ma kahi o ko Kahalaopuna hale aliʻi a ʻike lihi aʻela i kona uʻi. Ma muli o ko lāua lili no ka lilo ʻole o Kahalaopuna i kekahi o lāua, hoʻopunipuni akula lāua iā Kauhi penei, ʻoiai ʻo ia e ʻauʻau ana ma Waikīkī, “Ua hoʻolei ʻia mai nei māua i ka lei e Kahalaopuna.” Ua piʻi maila ko Kauhi huhū a lili a hoʻoholo ihola ia e lawe i ke ola o Kahalaopuna a make.

Ua piʻi aʻela ʻo Kauhi i uka i ka hale o Kahalaopuna. Hahai akula ʻo Kahalaopuna i kāna kāne a ka pōhaku nui i ʻAihualama, kekahi ʻili ʻāina i uka lilo o Mānoa. Ma laila ʻo ia i hili ai iā ia i ka ʻāhui hala a pā kona poʻo a hāʻule ihola ʻo ia. Me ka ʻāwīwī ʻo ia i kanu iho ai i ke kino make o Kahalaopuna ma kahi o ka pōhaku nui, a iho akula i ke awāwa no Waikīkī. ʻAʻole ʻo ia i mamao aku, ua hōʻea maila he pueo nui, ko Kahalaopuna ʻaumakua, a hoʻomaka koke ihola ua pueo nei e hoʻōla iā Kahalaopuna a ola hou.

Iā Kauhi e iho ana i kai, lohe ʻia aʻela ʻo ia i ke oli ʻana mai o Kahalaopuna ma hope ona. Pēlā ʻo ia i ʻike ai, ua ola hou ʻo Kahalaopuna. No laila, piʻi hou aʻela ʻo ia i uka no ka pepehi hou ʻana i kāna wahine uʻi. Ua hili hou akula ʻo ia i ke poʻo o Kahalaopuna i ka ʻāhui hala a make. Kanu hou ihola ʻia kona kino i ka lepo a haʻalele akula iā Mānoa. Hoʻōla hou ihola ke akua pueo iā Kahalaopuna i ka hoʻi ʻana o Kauhi i kai. A oli hou akula ʻo Kahalaopuna i ke mele no Kauhi.

No ke kēia hana a i ka lima o ko Kauhi lawe ʻana i ke ola o Kahalaopuna, kanu ihola ʻo ia i ko Kahalaopuna kino ma lalo o kekahi kumu lāʻau koa. I ia manawa, ʻaʻole hiki ke loaʻa ke kino i kona akua pueo, no ka mea, hihia nō ke kino i nā aʻa o ke koa a paʻa loa. Aia naʻe kekahi manu ʻelepaio, he ʻohana no Kahalaopuna, i ka lālā o ke kumu koa e nānā ana i ka hana ʻino a Kauhi. ʻO kona hoʻi akula nō ia i ke awāwa ʻo Mānoa no ka hoʻomaopopo ʻana i ko Kahalaopuna ʻohana i kona make ʻana. Hoʻi pū ka ʻuhane o Kahalaopuna i Mānoa a kau ma ka lālā o kekahi kumu ʻōhia. Ua ʻikemaka aʻela ʻo Mahana iā ia, kekahi aliʻi ʻōpio, a hahai akula ʻo ia i ka ʻuhane a kahi i kanu ʻia ai kona kino. Na Mahana i ʻeli hou i kona kino a hoʻihoʻi i kona kauhale i Kamōʻiliʻili, ka ʻili ʻāina ma kai iki o Mānoa. Ma laila ʻo ia i hoʻōla hou ai iā Kahalaopuna me ke kōkua nui ʻana mai o kona mau kāhuna. I kona ola hou ʻana, ua nāwaliwali nō ke kino, no laila, mālama pono ʻo Mahana iā ia i ka malu o ke ana ma lalo o ka honua i ʻike ʻole ʻia ʻo ia e Kauhi.

Māhele ʻElua
I ka hala ʻana o nā makahiki, ulu aʻela ke aloha ma waena o Kahalaopuna me Mahana, akā, maopopo iā Mahana a me kona ʻohana, aia nō a make ʻo Kauhi, a laila, hiki ke hoʻāo me Kahalaopuna. No laila, ua hiki mai ka lā e hōʻike ai ʻo Kahalaopuna i kona ola mau ʻana iā Kauhi a me ka lehulehu. Ua kū maila ʻo Kahalaopuna i mua o ka Mōʻī, nā aliʻi a me Kauhi a ʻikemaka lākou a pau i kona kino kanaka ʻoiaʻiʻo.

ʻAʻole i ʻemo, ua ʻā aʻela ka imu a ʻenaʻena, hopu ʻia ʻo Kauhi a me nā aliʻi hoʻopunipuni, a kiloi ʻia akula lākou i loko o ka imu no kā lākou mau hana ʻino loa. I ia pō, ua hoʻouna ʻia akula ko Kauhi akua manō he kai mimiki nui; piʻi aʻela ke kai a kahi o ka imu a lawe pū ʻia nā iwi o Kauhi i kai. Ma muli o kona pilina i ke akua manō, ua lilo ʻo ia i manō niuhi.

I loko o nā makahiki, ua noho ʻo Kahalaopuna i ka hauʻoli me Mahana ma Kamōʻiliʻili. Kipa mau akula kona kupuna kāne ʻo Akaaka iā ia, a aʻo maila ʻo ia i kona moʻopuna, ʻaʻole e hele hou i kahakai o plikia auaneʻi. No ʻelua makahiki, mālama ʻo Kahalaopuna i kēia kauoha a kona kupuna kāne, akā, i kekahi lā, ulu aʻela ka ʻiʻini i loko ona e hele i kahakai. Ua hoʻokō ʻo ia i kona ʻiʻini i ka heʻe nalu ʻana ma Waikīkī. Me ka ʻāwīwī e holo ai ʻo Kauhi a nahu aʻela a kaʻawale lā ke kino o Kahalaopuna i loko o nā paukū ʻelua.

Ma kēia make hou ʻana o Kahalaopuna, ua hoʻi akula ka ʻohana a pau o Kahalaopuna i ke awāwa ʻo Mānoa, a haʻalele nui ihola lākou i ko lākou mau kino kanaka a lilo aʻela lākou i mau kino pāhaʻohaʻo o ka ʻāina.

    • He pu‘u ‘oi‘oi kona kupuna kāne ‘o Akaka. He ulu lehua kona kupunahine ‘o Nālehuaoakaaka. E ʻike paha ʻoukou iā lāua i ko kākou piʻi ʻana i ka puʻu ma ʻō.
    • ‘O ka makani o Mānoa kona makua kāne. ʻO Kahaukani kona inoa. ‘O ka ua kaulana o Mānoa kona makuahine. ‘O Kauakuahine a i ʻole ka ua Tuahine kona inoa.
    • Haʻalele pū ʻo Kahalaopuna i kona kino kanaka a lilo ʻo ia, ‘o ia ke ānuenue o Mānoa. 

Inā maiau a maʻemaʻe koʻu haʻi hou ʻana i ko Kahalaopuna moʻokūʻauhau a moʻolelo, e lohe ana paha ʻo ia a me kona ʻohana i ko lākou mau inoa a e ʻikemaka ana paha kākou iā lākou—e ahuwale aʻe ana paha nā pali a me nā kualono, e heleleʻi mai ana paha ka ua kilihune ʻo Kauakuahine, e pā aheahe mai ana paha ʻo Kahaukani, a e piʻo aʻe ana paha ke ānuenue.

  • Ma ka moʻolelo a me ka mo‘okū‘auhau o Kahalaopuna, hiki ke ʻike ʻia, pili ka ‘āina a me ke kanaka Hawai‘i. A i kēia lā, ma muli o ko kākou haʻi hou ʻana i ka moʻolelo no nā kupa o Mānoa ma Mānoa nei, ua ola nā iwi iā kākou a aia ana nō ho‘i kākou i ka mo‘okū‘auhau o Kahalaopuna a me kona kulāiwi hanohano. Ola ka hā loa o ko Mānoa. Ola!
  • Ma luna o ka puʻu, e kuhi ke kumu i nā wahi pana a me nā kūpuna o ka moʻolelo (Akaka, Nālehuaoakaka, Kauhi ma Waʻahila). E kuhi nō hoʻi i ke ākea o ke awāwa me ka haʻi ʻana i nā haumāna, “E pili ka maka a mahuʻi i nā loʻi i uhi iā lalo o ke awāwa e like me kā Kupuna Maka i wehewehe ai. E kaʻakaʻa ka maka i kēia manawa. ʻOkoʻa i kēia wā, ʻeā?”

Ka Hui ʻAlua (No Kawelo a me Kūkaʻōʻō)

Nā manaʻo nui

  • E wehewehe i ka manaʻo o ka heiau a me nā mea i pili i nā hana i laila (he hoʻokupu ka heiau.)
  • Ka moʻolelo no ko Kawelo kīloi ʻana i kāna ihe.
  • No ka loli o ka ʻāina mai ka wā ma mua mai ʻānō.
  • E hoʻokomo i kekahi mea kanu a me ka pilina i ka wai.

No Kawelo a me Kūkaʻōʻō 

(haʻi hou ʻia e Kalehua Krug)
Kahiʻukākuakapu o Kawelo,
ʻO nā mahamaha o Kawelo maha iʻa
ʻO nā maha iʻa ia o Kawelomahamahaiʻa
He kanaka ʻo Kawelo, he iʻa,
He kanaka i kupu nā oho i ka lae
ʻO ke ʻāmio, ka mio o ka iʻa kapu,
No laila ka unahi mākoe aliʻi,
Kawelo hiʻu iʻa, ʻo ka unahi kala kua,
I ke kala kua i ka ʻapi maha o ka iʻa,
ʻO nā hāpuna maka o ka iʻa kapu,
Inu a māhuna ka iʻa i ka ʻawa,
He iʻa nō, he kanaka kekahi kino,
ʻO ua kino kanaka lā o ke awakoʻo
E koʻokoʻo ana i Wailuahōʻano.

Kamakapu (k) – Pāwahine (nā mākua o Kawelo)
Mōʻī nui o Kauaʻi me kāna wahine ʻo Kapōhinaokalani.
Ua hana ʻo ia i nā hana e laupaʻi nui ai nā kanaka ma luna o ka ʻāina ma muli o kona nānā ʻana i ke kanaka nui a me ke kanaka iki, ke kanaka ulakolako a me ke kanaka hemahema a nele o ka noho ʻana.  Ua hoʻomāhuahua aku ʻo ia i nā ʻāina o nā aliʻi ʻeleu a mikiʻala ma ka hana, a ʻo nā aliʻi palaualelo a makemake ʻole i ka hana, ua paʻi akula ʻo ia i kekahi mau lihi pepeiao o ko lākou mau ʻāina, a hāʻawi aʻela no nā makaʻainana nele ʻāina, a makemake hoʻi e hoʻoulu i nā mea e waiwai ai ka ʻāina, e ola ai ka noho ʻana o ke kāne a me ka wahine a me kā lāua mau keiki.  No laila ua ulu nui ka lāhui kānaka a nui nō hoʻi ke kūʻonoʻono ma luna o ka ʻāina mai ʻō a ʻō.  Ua maluhia nō hoʻi ka ʻāina ʻoiai ua lako nā mea a pau e pono ai ka noho ʻana.   Ua nui ke aloha o nā aliʻi a me nā makaʻainana i ko lākou Mōʻī a ma kona wā i make ai, ua hoʻomana maoli ʻia ma ke ʻano i Akua.

Hele mai ʻo Kawelo-mahamaha-iʻa mai Kauaʻi mai a kū i luna o Konahuanui a nānā mai i lalo nei. Kīloi mai ʻo ia i ka ihe makawalu a kū i lalo o ka honua a huʻe i ka lepo a me ka pōhaku. A kapa ʻia ka inoa o kēia wahi ʻo “Kūkaʻōʻō.” Manaʻo ʻia, aia ma loko o Kūkaʻōʻō kahi i kū ai kā Kawelo ihe ʻōʻō. Mai luna mai o ka heiau, ʻike ʻia ka mānoa maoli o nei awāwa ʻo Mānoa a me ke kahe pono ʻana o ka wai mai uka mai. Ua koho pono ʻo Kawelo i kona wahi e waiho ai i kāna ihe ʻōʻō.

He hana ʻia ka ʻōʻō me ka lāʻau ʻoʻoleʻa loa ʻo ke kauila, ka uhiuhi, ke koaiʻa a he mau kumu lāʻau e ulu nei ma MHC.

Kūkulu hou ʻia ka heiau e Billy Fields.  Ma mua he heiau i hoʻomana ʻia no ka ulu kalo a me ka lako o ka ʻāina.  He kalo wale nō ka ʻāina ma mua a laila ka laiki, a laila ka poʻe hānai pipi.  I heiau ʻo Kūkaʻōʻō e kupu pono ai ka ʻāina.  He hoʻokupu.  Kupu ka ʻāina i ka wai…he ua, he wai kahe, he wai o ka ʻāina.

Ka Hoʻomākaukau Hōʻikeʻike

  • E hui hou nā haumāna i ka pā mauʻu nui ma lalo o ka lānai. ʻŌlelo hou ʻia nā ʻōlelo kuhikuhi no ka haʻawina a laila kaʻawale hou ʻia nā haumāna ma nā hui ʻelua i ʻelua hui hou aku.E hoʻomākaukau a hoʻomaʻamaʻa nā haumāna no ka haʻi/hōʻikeʻike moʻolelo ʻana i mua o nā hoa papa.
    • Na ka hui ʻekahi ka māhele mua o ka moʻolelo no Kahalaopuna,
    • Na ka hui ʻelua ka māhele ʻelua o ka moʻolelo no Kahalaopuna
    • Na ka hui ʻekolu ka moʻolelo no Kūkaʻōʻō me Kawelo
    • Na ka hui ʻehā ka moʻolelo no Kūkaʻōlō me Kawelo.
  • E hoʻomākaukau a hoʻomaʻamaʻa nā haumāna no ka haʻi/hōʻikeʻike moʻolelo ʻana i muanā hoa papa.
    • Nā inoa o nā kūpuna a me nā inoa ʻāina
    • Ka moʻokūʻauhau o nā kūpuna a me ka ʻāina
    • Ka pilina i ka wai
    • 2 mea ulu Hawaiʻi 

10:00am – 10:30am

E haʻi hou nā haumāna i nā moʻolelo/moʻokūʻauhau i aʻo ʻia i mua o nā hoa papa ma ka pā mauʻu nui a i ʻole i ka lānai o ke keʻena.

Ka Hōʻikeʻike Moʻolelo

  • Eia paha nā nīnau e nīnau ai i nā haumāna ma hope o kā lākou hōʻikeʻike i moākāka loa ka moʻolelo iā kākou a pau a i paʻa pono nā manaʻo nui (moʻokūʻauhau, haʻi moʻolelo, maiau, maʻemaʻe, wai, pilina o ke kanaka me ka ʻāina).
    • Pehea i pili ai kāu moʻolelo i ka wai?
    • ʻO wai nā inoa o nā kūpuna ma kāu moʻolelo?
    • ʻO wai nā inoa o nā wahi pana ma kāu moʻolelo?
    • He aha nā ʻano mea kanu Hawaiʻi ma kāu moʻolelo?
    • Pehea i pili ai ke kanaka a me ka ʻāina ma kāu moʻolelo?
    • No ke aha he mea nui ka hoʻomanaʻo a haʻi hou ʻana i kēia mau moʻolelo/moʻokūʻauhau?

10:30am -11:00am

E pāʻina awakea i ka pā mauʻu nui a i ʻole i ka lānai o ke keʻena.

Ma Hope o ka Huakaʻi

I ka hoʻi ʻana i ke kula…

  • E kākau nā haumāna e pili ana i ka huakaʻi ʻana i ka Hale Hōʻikeʻike ʻo Mānoa Heritage i mea e paʻa pono ai ko lākou mau manaʻo no nā mea i aʻo ʻia.
  • Eia nā nīnau a lākou e pane ai (nā nīnau ma nā paka ua ʻekolu i ka ʻili hope o ka palapala haʻawina):
    1. I mea aha ka moʻokūʻauhau a me ka moʻolelo?
    2. He loina Hawaiʻi koʻikoʻi ka hoʻopaʻanaʻau ʻana i nā moʻokūʻauhau a me ka haʻi ʻana i nā moʻolelo. No ke aha?

    3. Pehea ʻoe e hoʻomau ai i kēia loina i ka hoʻi ʻana i ke kula a me ka hale?

© Na Maya Saffery lāua ʻo Kalehua Krug

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s