Welina Mānoa

Ka Huakaʻi

I kēia ʻaoʻao, e hōʻike iki ana mākou i nā hana no nā keiki ma Ka Papa Loʻi ʻO Kānewai.

Ua hoʻomaka mai mākou i ka huakaʻi me Keoki Faria, ua haʻi maila ʻo ia i ka moʻolelo o Ka Papa Loʻi ʻO Kānewai. Hoihoi nā keiki i ka moʻolelo. Ua aʻo mai lākou e pili ana i ka laulima, ka loina o ka hana pū ʻana.

A laila, ua hele mākou i ka poʻowai a aʻo maila e pili i ke kahawai. Ua aʻo nō hoʻi nā keiki e pili i ke kino. Na lākou i hīmeni a hula i ke mele o ke kino. Ma hope iho, ua lawe akula mākou i nā pākeke a me nā ʻupena a hei aʻela i nā mea like ʻole i ke kahawai. Luana nā keiki ma ke kahawai. Ua aʻo ʻia mai nā mea ola ma Kānewai.

Ua ʻohi ʻia nā lau ma ka honua a ua hehihehi i nā lau i loko o ka loʻi. Nui nā kumu o ia hana a mākou i haʻi ʻia aku ai.

No ka hopena o ka huakaʻi, ua aʻo maila mākou e pili i nā ʻano like ʻole o ke kalo i ulu ma Ka Papa Loʻi ʻO Kānewai. A laila, ua huli nā lima o nā keiki i lalo i ka loʻi a ua huki ihola i ke kalo. Ua aʻo mākou i ka hoʻomaʻemaʻe ʻana, ka ʻoki ʻana, a me ke kanu hou ʻana i ke kalo. Ua lawe mai nā ʻohana pākahi a pau i ke kalo.