Welina Mānoa

Ka Huakaʻi ʻAna i Kahi Hoʻoulu Lāʻau o Lāiana

Ka Papa Haʻawina No Ke Kumu Aʻo

E kaomi i kēia ʻōlelo no ka hoʻīli ʻana mai i ka papahana haʻawina ma ke ʻano he pdf

Nā Manaʻo Nui

He huakaʻi kēia e maopopo ai…

  • He moʻolelo a he moʻokūʻauhau ko ka ʻāina, ka wai, nā akua, a me nā kānaka.
  • Pili ka ʻāina mai uka a i kai a pili nō hoʻi ka ʻāina a me ke kai.
  • He mea nui ka ʻike maka a lohe pepeiau ʻana i ka ʻāina i kamaʻāina nō kākou i ka ʻāina.
  • Ola ka ʻāina i ke kanaka a ola ke kanaka i ka ʻāina. Pono kekahi i kekahi.
  • I ka holo ʻana o nā makahiki, emi iho ka nui o nā ʻōiwi ma ka Mānoa, akā, ua hoʻomaka ka hoʻi ʻana mai o kekahi mau ʻōiwi.

Nā Kumu ʻIke

Ma Mua o ka Huakaʻi

  • E heluhelu nā haumāna i ka palapala haʻawina ʻo Welina Mānoa no Kahi Hoʻoulu Lāʻau o Lāiana i launa mua ʻia ka wahi e kipa ana a i maopopo ke ʻano o ka haʻawina e hana ana ma laila.
  • E nānā paha i ka palapala haʻawina ʻo Welina Mānoa i hoʻomōhala ʻia no nā ʻohana a me nā keiki i piha ai nā makahiki he ʻewalu (a emi iho) e pili ana i Kahi Hoʻoulu Lāʻau o Lāiana i launa mua ʻia ka moʻolelo no kēlā wahi.
  • E nānā paha i nā palapala ʻāina i maopopo kahi e hele ana a me kona pilina i nā wahi ʻē aʻe o Mānoa i kipa ʻia ma mua.

 ***E Makaʻala*** 

Ma ka papa haʻawina, …

  • Uliuli nā ‘ōlelo i ke kumu.
  • ʻEleʻele nā ʻōlelo a ke kumu i nā haumāna.

 

Ka Huakaʻi

8:45am – 9:15am

E hoʻolele ʻia nā haumāna a me ka/nā kumu ma kahi o Paradise Park. E piʻi ʻia aʻela ke alanui i uka a ka Hale Hālāwai ma ka māla “Ethnobotany” o Kahi Hoʻoulu Lāʻau o Lāiana.

Nā manaʻo nui e kālele ai:

  • He moʻolelo a he moʻokūʻauhau ko ka ʻāina, ka wai, nā akua, a me nā kānaka. Ma Kahi Hoʻoulu Lāʻau o Lāiana e hui hou ai me Kahalaopuna a me kona ʻohana.
  • Pili ka ʻāina mai uka a i kai a pili nō hoʻi ka ʻāina a me ke kai. Aia nā kumu wai he ʻehiku o Mānoa ma Kahi Hoʻoulu Lāʻau o Lāiana. Mau nō ke kahe ʻana mai o ka wai mai Lāiana a i Waikīkī, kahi o Ka Hale Hōʻikeʻike Iʻa o Waikīkī.
  • He mea nui ka ʻike maka a lohe pepeiau ʻana i ka ʻāina i kamaʻāina nō kākou i ka ʻāina. ʻAʻole lawa ke heluhelu ʻana i nā moʻolelo ma ke kula. Pono ka hana ʻana i nā ʻāina a me  ke kipa ʻana i nā kūpuna i paʻa nō lākou i ka naʻau o nā haumāna.
  • Ola ka ʻāina i ke kanaka a ola ke kanaka i ka ʻāina. Pono kekahi i kekahi.
  • I ka holo ʻana o nā makahiki, emi iho ka nui o nā ʻōiwi ma ka Mānoa, akā, ua hoʻomaka ka hoʻi ʻana mai o kekahi mau ʻōiwi. E aʻo ana nā haumāna e pili ana i kekahi o nā ʻōiwi i emi iho a e hoi ana mai e laʻa ka ʻamakihi no Oʻahu.

E Hoʻokuleana a Hoʻopaʻanaʻau!

E hoʻi kākou i nā kumu wai Mānoa!

E wehewehe ke kumu i nā haumāna—Ma kēia papa haʻawina nui ʻo Welina Mānoa, ua hahai kākou i ka wai o Mānoa mai ka muliwai o Waikīkī, ke poʻowai o Ka Papa Loʻi ʻo Kānewai a me ka ua Tuahine i ka Hale Hōʻikeʻike ʻo Mānoa Heritage. I kēia lā, ua piʻi aʻela kākou i uka lilo o ke awāwa a hiki i kahi o nā kumu wai he ʻehiku o Mānoa a me ka ʻohana o Kahalaopuna. Eia kākou i nā ʻili ʻāina ʻo Haukulu me ʻAihualama i ke awāwa o Mānoa i ke ahupuaʻa ʻo Waikīkī i Kahi Hoʻoulu Lāʻau o Lāiana.

E ʻike maka kākou iā Mānoa!

Wahi a kupuna, nānā ka maka, hoʻolohe ka pepeiao, a paʻa ka waha[1]. No laila, ʻoiai kākou e piʻi ana i uka mai ke kaʻa ʻōhua a hiki i ka hale hālāwai, e hāmau ka leo a e mālie ka hele i ʻike maka a lohe pepeiao ʻia nā mea like ʻole a i pā ka naʻau i nā kūpuna o kēia ʻāina. Pēlā kākou e hoʻokamaʻāina ai i kēia ʻāina. He mau nīnau kā ʻoukou e noʻonoʻo ai ma kēia piʻina. Ma ka hale hālāwai ana ʻoukou e hōʻike ai i kā ʻoukou mau pane.

  • He aha kā ʻoukou mau mea e lohe nei, e honi nei, a e ʻike nei?
  • Pehea ka ulu ʻana o nā lāʻau ma ʻaneʻi?  He māloʻo a he uluwehi paha?
  • He aha nā inoa o nā mea ulu a ʻoukou i ʻike ai?
  • Ma ka nānā aku, i wahi aha Kahi Hoʻoulu Lāʻau o Lāiana?

Eia kekahi—i ka puka ʻana aku i uka ala i kekahi kilohana, e ʻike maka ana ʻoukou iā Mānoa e waiho kāhelahela i ka uhiwai mai ka piʻina ʻoluʻolu o Waʻahila nei a ka uka o Waiakeakua lupalupa i ka lau nahele[2]. Ma laila kākou e haʻi ai i ka moʻokūʻauhau o Kahalaopuna i hoʻohanohano ʻia nā inoa o nā kūpuna o Mānoa.

Eia hou ka moʻokūʻauhau o Kahalaopuna. E haʻi pū ʻia kona moʻokūʻauhau i ka puka ʻana i ke kilohana a laila, e kuhi aku ke kumu iā Akaaka a me Nālehuaoakaaka.

‘O Akaaka ke kāne. ‘O Nālehuaoakaaka ka wahine.
Moe pū lāua a hānau mai he mau keiki māhoe.
‘O Kahaukani ke keiki kāne a ‘o Kauakuahine ke kaikamahine.
Moe nī‘aupi‘o lāua a hānau mai ‘o Kahalaopuna, ke kaikamahine ali‘i kapu o Mānoa.
Ola ka hā loa o ko Kahalaopuna ʻohana. Ola!

9:15am – 9:45am

I ka hui ʻana i ka Hale Hālāwai, e hāpai nā haumāna i nā mea a lākou i ʻike, lohe, honi, … ai. I loko o kēia hōʻike manaʻo ʻana, e haʻi ʻia nā moʻolelo no ka ʻāina o Kahi Hoʻoulu Lāʻau o Lāiana, e hōʻike ʻia nā kiʻi kahiko o ka ʻāina, e kālele ʻia nā manaʻo nui o ka huakaʻi a me ka papa haʻawina holoʻokoʻa ʻo Welina Mānoa, a e wehewehe ʻia ka haʻawina nui o ka huakaʻi.

Ka Moʻolelo No Mānoa

  • Ma Mua: He nani uluwehi kēia ‘āina i ka wā ma mua o ka hiki ‘ana mai o kānaka. He mau ulu ‘ōhi‘a, koa, lama a ‘iliahi ko kēia ‘āina. Ua ulu pū ka ‘awa, nā ōpū hau a me ka hāpu‘u. Ma ka hiki ‘ana o nā kūpuna i kēia wahi, ua kanu ihola lākou i ke kalo. I ‘āina kēia e ulu ai nā mea ulu a e ola pono ai ho‘i nā kūpuna i noho ma ‘ane‘i. E like me ka ʻōlelo a Kupuna Hanale Maka, “He ‘āina kalo nui ‘o Mānoa; ‘oi aku kona nui ma mua o Waipi‘o. Ua piha ‘o Mānoa i nā lo‘i kalo ma nā ‘ao‘ao ‘elua mai uka a i kai.
  •  Ma Hope: I ka hiki ‘ana mai na‘e o nā haole, kanu ‘ia ka laiki ma nā lo‘i kalo. Ma hope, ua hiki mai nā ‘oihana mahikō a me ka po‘e hānai pipi. ‘A‘ai ihola kā lākou mau pipi i nā mea ulu ‘ōiwi a pau. I ia wā, ʻaʻohe kumu lāʻau nui i koe, no laila, ua kanu ihola  ‘ia nā mea ulu haole e ulu ‘āwīwī ana, ‘o ia ho‘i, nā mau‘u haole a me nā kumu lā‘au haole i loa‘a ka ‘ai hou no nā pipi a i loa‘ai nō ho‘i nā kumu ki‘eki‘e e ‘ume‘ume ana i ka ua. Na ke kauka ‘o Lāiana i ho‘omaka i ua kanu ‘ana. Ua uluāhewa ia mau mea ulu haole āna i kanu ai a nalowale loa nā ulu ‘ōiwi. I kēia wā, ua ho‘omaka iho nei nā lima hana o Kahi Ho‘oulu Lā‘au o Lāiana i ka ho‘oulu hou ‘ana i nā mea ulu ‘ōiwi ma nei ‘āina. 
  • Nā Manu ʻŌiwi : Wahi a kekahi kupuna i kākau ai i ka nūpepa kahiko, “Aia ma mua o ka manawa i hiki ʻole mai ai ē kēia mau manu (haole), he nui loa ka ʻIwi, ka ʻAmakihi, ka ʻAkakane, ka ʻŌʻū, ka ʻŌʻōlokela, a me ka ʻElepaio, ma ʻaneʻi aʻe nō o mākou lā, i luna aʻe nei nō o nā ōpū aliʻipoe lā, a me nā ōpū hau, nā wahi kumu noni, a ma uka aku hoʻi, ke āiwaiwa o ka nui o na manu, i luna nō hoʻi o ka ʻĀhihi, a me Ka-lehua-kū-mākua, a he nānea nō ia no ia uka, a i kēia wā, ua pau loa lākou i ka nalowale, no ka hūhū ʻia paha e kēia mau manu ʻino.” (T. N. Penukahi, “He mau wahi kamaaina o ka ua Tuahine, ua nalowale”, Ke Au Okoa, 29 Iune 1871, ʻaoʻao 3)
  • Nā Kumu Wai: I loko lilo o ke awāwa ‘o Mānoa he ‘ehiku mau kumu wai–he mau wailele lākou: ‘o ‘Aihualama, ‘o Waihi‘inui, ‘o Waihi‘iiki, ‘o Lua‘alaea, ‘o Naniuapō, ‘o Wa‘aloa, a ‘o Waiakeakua nō ho‘i ko lākou mau inoa. Wahi a kahiko, “Inā e lepo ke kumu wai, e hō‘ea ana ka lepo i kai” (Pukui, 1983).
    • E nīnau i nā haumana—He aha ka manaʻo nui o kēia ʻōlelo noʻeau? (E hōʻike pū i ke kiʻi a Haley Kailiehu i hoʻomanaʻo lākou, pili nā māhele a pau o Mānoa a ʻo ka wai ka mea i pili ai.) ʻAe, no laila, he kuleana ko kākou e mālama i nā kumu wai i ma‘ema‘e ka papa loʻi kalo ʻo Kānewai a me nā muliwai i Waikīkī, ʻeā?
  • Nā Inoa ʻĀina (he hōʻailona i ka nui o ka wai ma Mānoa): Aia ka ʻike kupuna i loko o nā inoa ʻāina; i mea nā inoa ʻāina e maopopo ai ke ʻano o ka ʻāina a me ke ʻano o ka hana ma ka ʻāina, e laʻa…
    • Mānoa: ākea a mānoa ke awāwa
    • Haukulu, Waiakeakua: nui nā inoa ʻāina o Mānoa pili i ka wai, no laila…he ʻāina wai a waiwai nō ʻo Mānoa. Uluwehi nō kēia ʻāina, ʻeā? Nui ka ua ma ʻaneʻi.
  • Ka hana maiau a maʻemaʻe: Mahalo nā kūpuna i ka hana maiau a maʻemaʻe, a hōʻike ko lākou mahalo iā kākou ma o nā hōʻailona like ʻole–ma hope o ka haʻi pono ʻana i ka moʻolelo a moʻokūʻauhau no Kahalaopuna i ka Hale Hōʻikeʻike o Mānoa Heritage, heleleʻi mai ka ua Tuahine no ka mea lohe ʻia kona inoa a mahalo ʻo ia i kā kākou hoʻomanaʻo ʻana i kona ʻohana. I kēia lā, e lohe ana ʻoukou i kekahi mau moʻolelo no ka hana maiau a maʻemaʻe ma ʻaneʻi a me nā hōʻailona a nā kūpuna e mahalo ana i ia hana (Ma muli o ka hana a nā limahana o Lāiana a me nā kumu/haumāna o Hālau Kū Māna, ua hoʻi nō nā ʻōiwi i Mānoa–ʻike hou ʻia ka ʻamakihi a ulu maikaʻi ke kalo, nā mea ulu Hawaiʻi a me nā haumāna a me nā kumu Hawaiʻi.)

He Haʻawina—Nā ʻŌiwi o Mānoa

E kaʻawale ʻia ka papa i ʻelua hui liʻiliʻi. E noho paʻa kekahi hui i kēia ʻili ʻāina ʻo Haukulu a e hele aku kekahi hui i ka ʻili ʻāina ʻo ʻAihualama. E aʻo mai ʻoukou a pau e pili ana i kekahi o nā ʻōiwi o Mānoa i manomano ma mua a i emi iho ma hope a e hoʻi mai ana i kēia manawa. ʻOiai ʻoukou e mākaʻikaʻi ana, e makaʻala i nā meheu o ke emi a me ka hoʻi ʻana mai o nā ʻōiwi, no ka mea, e hui hou ana kākou ma hope, a na ʻoukou e haʻi hou i ka moʻolelo no nā ʻōiwi o Mānoa i maopopo i nā hoa papa.

9:45am – 10:00am

E kaʻawale ʻia ka papa i ʻelua ʻelua hui a hele kekahi i ka māla “Ethnobotany” a hele kahi i ka papa loʻi kalo o ʻAihualama.

E Hoʻāʻo Mai!

Ka Papa Loʻi Kalo o ʻAihualama (Hui ʻAkahi)

  • Ma mua o ka puka ʻana i waho o ka Hale Hālāwai, e haʻi ke kumu i nā haumāna—Wahi a kahiko, pau ke kalo, pau ke kanaka. Ma kekahi ʻano, inā pau ke kanu ʻana i ke kalo, inā pau ke kanaka Hawaiʻi, ʻoiai, he ʻohana ke kalo no kākou a ʻai nui ʻia ke kalo e ka Hawaiʻi. Eia hou aʻe, inā nui ke kalo, nui nō hoʻi ka Hawaiʻi. Inā nō naʻe emi ke kalo, emi nō hoʻi ka Hawaiʻi. Ma ka moʻolelo no Mānoa nei, ʻike ʻia kēia pilina o ke kalo me ke kanaka ʻōiwi. 
  • E lohe ana ʻoukou i kekahi moʻolelo no kēia ʻili ʻāina o ʻAihualama a me ka papa loʻi kalo i hoʻōla hou ʻia e nā haumāna a me nā kumu o Hālau Kū Māna, kekahi o nā ʻōiwi i hoʻi mai i Mānoa, i ka ʻike kupuna, a i ke aloha ʻāina. Mai poina…e haʻi hou ana ʻoukou i kēia moʻolelo i nā hoa papa ma hope, no laila, e makaʻala i …
    • ka inoa  o ka ʻili ʻāina a me ke kahawai
    • ka ulu ʻana o ke kalo a me ke kanaka ʻōiwi ma Mānoa ma mua
    • ke emi ʻana o ke kalo a me ke kanaka ʻōiwi ma Mānoa ma hope
    • ka hoʻi ʻana o ke kalo a me ke kanaka ʻōiwi i Mānoa i kēia manawa
  • E puka nā haumāna a me ke kumu i waho o ka Hale Hālāwai a iho i lalo. E kū ma ka puʻu i luna pono o ke kahawai i mea e hālō ai i lalo i ka loʻi kalo o ʻAihualama. E hoʻomanaʻo ke kumu i ka moʻolelo no Kahalaopuna, a laila ʻōlelo ʻo ia—I ka pepehi mua ʻana o Kauhi iā Kahalaopuna, ua piʻi aʻela lāua i uka o Mānoa i kekahi pōhaku nui. Hoʻomanaʻo ʻoukou i ka inoa o ka ʻili ʻāina o kēlā pōhaku nui? ʻAe, ʻo ʻAihualama ka inoa a aia i lalo nei ke kahawai ʻo ʻAihualama a aia ka ʻili ʻāina ʻo ʻAihualama ma kaʻe hikina o ke kahawai. Aia he papa loʻi kalo ma laila. E iho kākou i lalo, ʻaʻe i ke kahawai, a komo i ka ʻili ʻāina ʻo ʻAihualama.
  • ʻAʻole kēia he papa loʻi kalo hou. Na nā kūpuna o Mānoa i hana mua. Na Kupuna Oliveira me Kupuna Maka i hoʻomaopopo mai, i ko lāua wā kamaliʻi, ua kanu nui ʻia ke kalo ma nā loʻi o Mānoa mai uka a i kai, mai kekahi kapa a kekahi kapa o ke awāwa. ʻO ke kalo wale nō ka i ʻike ʻia i ia wā. Akā, i ka holo ʻana o nā makahiki, kūkulu ʻia ka ʻāina a emi iho ke kalo ma Mānoa. No nā makahiki he nui, ʻaʻole i mālama pono ʻia ua papa loʻi kalo ala. Ua pihaʻū ka ʻāina i ka nāhelehele a ālai ʻia ka mālamalama o ka lā e nā kumu lāʻau haole like ʻole he nui. Ma kahi o ka makahiki 2001, ua loaʻa hou akula ka ʻauwai a me nā kuāuna kahiko. Na Kaleomanuiwa Wong, kekahi limahana Hawaiʻi o Lāiana, i ʻauamo mua i ke kuleana e mālama i kēia ʻāina me ke kōkua ʻana mai o kona mau hoa hana, ʻAnakala Eddie Kaʻanāʻanā, a me nā papa kulanui o Mānoa me Kapiʻolani.
  • Ma hope o kō Kaleo wā, ili akula ke kuleana ma luna o nā kumu a me nā haumāna o kekahi kula Hawaiʻi ʻo Hālau Kū Māna. Ua ʻikemaka lākou i ka pono e loaʻa mai ma o ka hoʻi ʻana i ka ʻāina a me ka ʻike kupuna—kupu a mōhala wale nā pua o Hawaiʻi i ke aloha ʻāina. A ʻikemaka nō hoʻi kākou i ka hua o kā lākou hana nui. He nani nō ke nānā aku, ʻeā? Hiki ke ʻike ʻia, hana maiau a maʻemaʻe kā lākou hana.
  • ‘O nā haumāna a me nā kumu o Halau Kū Māna kekahi o nā ‘ōiwi i ho‘i mai i Mānoa. Na lākou e mālama pono i nā kumu wai i ko lākou ho‘okahe ‘ana i ka wai ma nā ‘auwai o ka papa lo‘i kalo o ‘Aihualama. Me he kino kanaka lā nā papa lo‘i kalo, wahi a ‘Īmaikalani Winchester, kekahi kumu kula o Hālau Kū Māna. Inā kahe pono ka wai hu‘ihu‘i a ma‘ema‘e i nā lo‘i, e ulu ikaika a ma‘ema‘e ana nō ho‘i ‘o Hāloa. Pēlā nō ko kākou kino.
  • E nānā i ke ʻano o ka loʻi kalo ma ʻAihualama. E hoʻomaʻamaʻa i nā inoa o nā māhele o ka loʻi a me ka pane ʻana i ka nīnau, “I wahi aha ka ____? I wahi e ___ ai.” ʻOkoʻa paha kēia loʻi, ʻokoʻa paha ka loʻi kalo o Kānewai? ʻOkoʻa ke ʻano o ka papa loʻi kalo ʻo Kānewai, ʻokoʻa ka papa loʻi kalo o ʻAihualama, no ka mea, ʻokoʻa nā ʻāina ʻelua. ʻOkoʻa paha nā loina/hana ma nā ʻāina ʻekolu, akā waiwai nā mea a pau, no ka mea, pili a kūpono ka hana/loina i ke ʻano o ka ʻāina. Akamai a maiau nā kūpuna no nā ʻāina a pau o Hawaiʻi nei, no ka mea, kamaʻāina loa iā lākou ke ʻano o ko lākou ʻāina a me nā hana/loina e pono ai kēlā ʻano ʻāina i lawa ka ʻai, ka wai, a me ka iʻa e hānai ai i nā kupaʻāina.
  • E hoʻomākaukau nā haumāna no ka hui hou ʻana me nā hoa papa–he aha nā manaʻo nui e aʻo ai? e hoʻokaʻawale i nā kuleana o ke aʻo ʻana ma waena o nā haumāna.
    • ka inoa  o ka ʻili ʻāina a me ke kahawai–ʻAihualama (ma laila i hili mua ʻia ai ʻo Kahalaopuna e Kauhi)
    • ka ulu ʻana o ke kalo a me ke kanaka ʻōiwi ma Mānoa—nui ʻino ke kalo ma Mānoa ma mua (nā ʻōlelo a Kupuna Olivera me Kupuna Maka)
    • ke emi ʻana o ke kalo a me ke kanaka ʻōiwi ma Mānoa– i ka holo ʻana o nā makahiki, kūkulu ʻia ka ʻāina a emi iho ke kalo ma Mānoa. No nā makahiki he nui, ʻaʻole i mālama pono ʻia ua papa loʻi kalo ala. Ua pihaʻū ka ʻāina i ka nāhelehele a ālai ʻia ka mālamalama o ka lā e nā kumu lāʻau haole like ʻole he nui.
    • ko hoʻi ʻana o ke kalo a me ke kanaka ʻōiwi i Mānoa–ka moʻolelo no ka loʻi o ʻAihualama a me Hālau Kū Māna (ua hoʻi nā ʻōiwi i Mānoa, ʻauamo lākou i ke kuleana i ka mālama ʻana i ke kumu wai a me ka ʻāina, a hiki ke ʻike ʻia ka hua o kā lākou hana maiau a maʻemaʻe; ua paʻa hou ka pilina ma waena o nā kānaka a me ka ʻāina o Mānoa.)
    • kekahi manaʻo nui—ʻokoʻa ka ʻāina no laila ʻokoʻa ke ʻano o ka loʻi a me ka hana/loina ma ka loʻi, akā waiwai nā mea a pau.

Nā Manu (Hui ʻAlua) 

  • E hele a i kekahi wahi ʻano kū kaʻawale ma ka māla “Ethnobotany” e hoʻolohe ai i nā kani a nā manu o laila.
  • E haʻi ke kumu i nā haumānaHe aliʻi ka ʻāina a he kauwā ke kanaka![3] Ma Kahi Hoʻoulu Lāʻau o Lāiana, ke kū hou nei ke aliʻi, ka ʻāina, i aliʻi hanohano i ka hoʻi ʻana mai o nā manu ʻōiwi. I ka wā ma mua, he mau ʻāuna pueo, ʻapapane, ʻelepaio, a ʻamakihi ko Mānoa. ʻO ia mau manu kai hoʻokāhiko i ke aliʻi ʻo Mānoa e like nō hoʻi me nā hulu manu i ʻaʻahu ai i nā aliʻi ma nā ʻahuʻula. Kākau maila ʻo Kupuna Penukahi[4], haʻalele akula nā manu ʻōiwi i ka nui loa mai o nā manu haole o Mānoa. I kēia wā, ke ʻike ʻia nei ka hoʻi ʻana mai o nā manu ʻōiwi i Mānoa. I hōʻailona kēia e ʻike ai i ka hoʻi pū ʻana mai o ka pono o ka ʻāina i ka hoʻi mai o nā ʻōiwi i Mānoa. E hoʻolohe i kekahi moʻolelo e pili ana i nā manu o Mānoa a e nānā pū kākou i luna o ke ēulu kumu lāʻau e ʻike ai paha i ka hoʻolāʻau ʻana o nā manu ʻōiwi!
  • Wahi a Pukui[5], “Elepaio, This bird was believed to be the goddess of canoe makers, hence the saying ua ʻelepaio ʻia ka waʻa, the canoe is [marked] by the ʻelepaio [an ʻelepaio bird pecking slowly on a tree trunk for insects signified that the trunk was insect-ridden and not suitable for a canoe (see kani 1); the saying may be applied to any failure]. The name also refers to one who craves fish but does not go fishing.”
  • Kauhi lāua ʻo Kahalaopuna; ʻaʻole ʻo ia i hoʻopau pono iā Kahalaopuna a i ka hopena o ka moʻolelo.  Pono ʻole ke kō ʻana o ko Kauhi mea i manaʻo nui ai.  He hōʻailona i ka pono ʻole o ke kumu koa i manaʻo ai ke kālaiwaʻa e kālai.  ke keiki a ke kaikaina o kona makuahine. Hōʻike akula ʻo Elepaio i ko Kahalaopuna ʻohana no kona make iā Kauhi, ʻaʻole wahi mea o lākou i hilinaʻi mai iā ia.  He manaʻo
  • ʻAmakihi me ʻapapane; i hoʻi mai lāua i ka maʻemaʻe ʻana mai o uka. He hōʻailona pū paha lāua i ka pono iki ʻana mai o ko lākou wahi i haliʻa aku nei.
  • He haʻi ʻōlelo iki e pili ana i nā manu me he hōʻailona pili ʻuhane ala. ʻAʻole wale nō ka manu he mea e lele mau ana i nā ulu lāʻau. He hōʻailona, he ʻahuʻula, he mahiole, he kapa, he kaupoku, he maile a me nā mea he nui hou aʻe.
  • E noʻonoʻo iki nā haumāna i ka hana e loaʻa mai ai ʻo ka hulu manu i ke kiamanu. Na lākou e kūkā aku a hiki i ka loaʻa mai o ka haʻina a laila e aʻoaʻo kekahi i kekahi.
  • E walaʻau liʻiliʻi i māhele ʻia nā kuleana aʻo ma ka wā e aʻo ʻia ai nā haumāna o kekahi hui. Pēia e holo ai ka haʻawina a kekahi hui, na nā haumāna e aʻo i ia haʻawina.

10:00am – 10:30am

E hui hou ka papa i ka papa loʻi kalo o ʻAihualama. Ma laila e hōʻike ai nā haumāna ma ka hui ʻakahi i nā mea i aʻo ʻia. Ma hope o kā lākou hōʻike manaʻo ʻana, e hoʻi ka papa i ka māla “Ethnobotany”. Ma laila e hōʻike ai nā haumāna ma ka hui ʻalua i nā mea i aʻo ʻia.

E Hōʻike Mai!

He aha nā meheu o nā ʻōiwi i ʻike ʻia?

E haʻi ke/nā kumu i nā haumāna—I ko ʻoukou mākaʻikaʻi ʻana, ua lohe ʻoukou i nā moʻolelo no ka hoʻi ʻana mai o nā ʻōiwi i Kahi Hoʻoulu Lāʻau o Lāiana. ʻIke anei ʻoukou i nā meheu o nā ʻōiwi i hoʻi mai i Mānoa? Ua hiki mai ka manawa e haʻi hou ai i nā moʻolelo no nā ʻōiwi o Mānoa a e hōʻike ai i nā meheu i ʻike ʻia i nā hoa papa. E nānā aʻe kākou a e ʻimi pū i ia mau meheu. E kākau iho i nā meheu ʻōiwi i loaʻa mai ma ka aoao hope loa o ka palapala haʻawina.

10:30am – 11:00am

E pāʻina awakea i ka pā mauʻu nui. Ma hope pono, e iho hou i nā kaʻa ʻōhua ma kahi o Paradise Park. Inā puʻu mimi kekahi haumāna, e hoʻomaha iki i ka Hale Keiki ʻoiai lākou e iho ana i ke alanui.

Ma Hope o ka Huakaʻi

I ka hoʻi ʻana i ke kula…

  • E kākau nā haumāna e pili ana i ka huakaʻi ʻana i ka Kahi Hoʻoulu Lāʻau o Lāiana i mea e paʻa pono ai ko lākou mau manaʻo no nā mea i aʻo ʻia.
  • Eia nā nīnau a lākou e pane ai (nā nīnau ma nā paka ua ʻekolu i ka ʻili hope o ka palapala haʻawina):
    1. Pili nā kumu wai o Mānoa i ke kai o Waikīkī? Pehea e pili ai?
    2. No ke aha i emi iho ai nā ʻōiwi o Mānoa?

    3. No ke aha e hoʻi mai ana nā ʻōiwi o Mānoa i kēia manawa? He mea koʻikoʻi kēia hoʻi ʻana mai?

[1] Pukui, 1983, p. 248, ʻOlelo Noʻeau #2268

[2] Ka ʻōlelo a Kumu Hula Mae Lobenstein ma kinohi o ke mele ʻo “Nani Mānoa” i ke pa CD ʻo Hoʻokamahaʻo a Hoʻokena (1996).

[3] Pukui, 1983, p. 248, ʻŌlelo Noʻeau #531

[4] Ke Au Okoa, 29 Iune 1871, ʻaoʻao 3

[5] Pukui, 1986, p. 41, Hawaiian Dictionary

 

© Na Maya Saffery lāua ʻo Kalehua Krug

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s